1 Timothy 2
Cahwanoi Yehoba 'oina
1Bewa 'igu loina 'imi miya hegogona 'oidiya, nugeta watuluha ma wa'ahwanoi Yehoba 'oina, tomota mabwaiyadi weyahidi, ma'imi loyauwedo Yehoba 'oina. 2Gide kiniyao ma toloinao weyahidi wa'ahwanoi, ma 'ane 'idi loina 'idumwalu ma 'oinega tamiya daumwala ma'ida mumuga mabwaiyana bwebwe'ana.3Cada to'abihetenaina Yehoba nuwanuwana bewa gide ta'ahwanoi 'esa, 4weyahina Yehoba 'ina nuwatuhuina 'abehega tomota mabwaiyadi 'idi pui 'oidiyega 'i'abihetedi, ma he'ita moisa sisanapu.
5Yehoba 'aigeda tuwamo, ma wete 'aigeda tuwa loheya sowasowana 'i'ewegita Yehoba 'oina, tauna Yesu Keliso. 6Weyahina Keliso 'itagwaleya ta 'iboi 'ipwaoliyeya mabwaiyada weyahida, ta wasaina bewa tuta 'ana lobwaina moisa 'oina, Yehoba 'i'ebwaegita.
7Coinega 'igu paihowa 'i'ebwaegauwa ma wasaina bewa yahehepwaili ma yaguguguyae ma yahehe'ita taudi tomiya ganamuli 'oidiya, ma 'ane sanapu moisa Yehoba 'oina sihemisae. Bewa gwae moisa, geya 'abo.
8Nuwanuwagu loheloheya tupwa mabwaiyadi 'oidiya mumugadi sibwebwe'ana, ma nimadi si'abilagasi ta si'ahwanoi Yehoba 'oina, ma sahena sihehegamwagamwagu ma sihehe'ahwalasalasa.
9Wahiwahine wete nuwanuwagu siboi sihepasadi mumuga bwebwe'adi 'oidiyega weyahina beno totapwalolo 'ilobwaineya, ma sahena wahidi sipasa hedadedi ma 'oina 'idi tuta siuleule, ma sida pasa moisa, ma sahena sigagagagasa. 11Ma wete tapwalolo 'alona ma 'idi nuwatagwala he'ita sihesagohe, ma sahena sigwaegwae. 12Geya yatagwala ma wahiwahine sihe'ita tapwalolo 'oina. Sahena siloiloina loheloheya 'oidiya, ma hesi sida miyahenono ma sihesagoha. 13Weyahina Yehoba Adama 'ipaihowa nugeteya, ma muliyega Ibe. 14Ma wete Seitani 'ina 'abo 'oinega Adama geya 'iwe'a, ma wahine hesi 'iwe'a ta 'ipui nugeta. 15Ma bewa tutaina 'oina wahiwahine 'idi tuta henatuna 'oina, Yehoba sawasawahina 'i'abihetedi, 'eguma ma'idi hemisa, ma wete ma'idi helau, ma mumugadi 'ehauna, ta dumwaluna.
Copyright information for
BDD